Prošeavtta siskkáldas semináras plánegođiimet rabas neahttaseminára prošeavtta bohtosiid birra. Seminára lágiduvvo earenoamážit mánáidgárddiid ja skuvllaid oahpaheddjiide ja oahpaheaddjeoahpuid studeanttaide.
|
Seminára heive maiddái earáide geat beroštit mánáid gielas ja jurddašeamis. Dat lágiduvvo ođđajagimánus 2021. Eambbo dieđut bohtet.
|
Muđui mii barggaimet girjjážiin mas muitalit prošeavtta bohtosiid birra. Áigut čilget mot mánát dulkojit ja árvvoštallet ehtalaš gažaldagaid, ja mot dát árvvoštallan boahtá ovdan sin gielas.
|
Mii čohkket girjjážii maiddái evttohusaid mot mánáidgárddis ja skuvllas sáhttá bargat muitalanárbevieruin ja mot mánáiguin sáhttá ságastallat ehtalaš ja morálalaš áššiid birra. Eambbo dieđut bohtet girjjáža almmuheami birra.
|
Dasa lassin ságastalaimet guhtet guimmiideamet čállosiid birra maiguin leat bargame.
Čállosiid fáddán lea mánáid ehtalaš ja morálalaš jurddašeapmi ja dat mot modalitehta boahtá ovdan mánáid giellageavaheamis. Čállit maid dan birra mot oahpaheaddjestudeanttat sáhttet searvat dutkanprošeavttaide. Govat: Johanna J. Ijäs ja Nils Oskal |