Prošeavttas guorahallat makkár oktavuohta lea mánáid giellageavaheamis ja ehtalaš jurddašeamis. Prošeakta gullá máŋgga dieđasuorgái: gielladiehtagii, filosofiijai, pedagogihkkii ja girjjálašvuođadiehtagii.
Ulbmil lea čielggadit mot viđa–čiežajahkásaš mánát dulkojit ja árvvoštallet ehtalaš gažaldagaid, ja mot dát árvvoštallan boahtá ovdan sin gielas. Mii čielggadit makkár gielalaš vugiiguin mánát ovdanbuktet vejolašvuođa, jáhkehahttivuođa ja sihkarvuođa. Materiála čoaggit mánáid ja rávisolbmuid ságastallamiin. Ságastallamiid vuođđun leat muitalusat main leat iešguđetlágan ehtalaš čuolmmat maid sáhttá čoavdit máŋgga ládje, ja maid čovdosiid sáhttá ákkastallat máŋgga ládje. Materiálačoaggimis leat Sámi allaskuvlla masterstudeanttat guovddážis. Prošeakta galgá addit dieđuid mot mánáidgárddis ja skuvllas sáhttá nannet ja ovddidit mánáid giela ja mot ehtalaš áššiid birra sáhttá ságastallat mánáiguin. Prošeavtta áigge lágidit guokte seminára maid fáddán lea mánáid ehtalaš jurddašeapmi ja giellaoččodeapmi. Seminárat lágiduvvojit ovttas UiT Norgga árktalaš universitehtain ja Ubmi universitehtain. |
|